Pr Azar 0

Pas bilong Jeremaia

Pas bilong Jeremaia ▼

▼6.1Sampela saveman i save putim dispela pas i stap olsem sapta 6 bilong buk bilong Baruk. Na sampela i save larim dispela pas em yet i stap olsem narapela buk ol i kolim olsem, Pas bilong Jeremaia.

(Sapta 6)

Em ^b hia tok bilong pas Jeremaia i bin salim i go long ol manmeri bilong Jerusalem, klostu long taim king bilong Babilon i kalabusim ol na bringim ol i go long Babilon. Dispela pas i gat ol toktok God i bin givim long Jeremaia bai em i ken autim long ol manmeri bilong Jerusalem.

Ol manmeri bilong Jerusalem bai i go kalabus

Yupela i mekim rong long God. Na long dispela as tasol i no longtaim na King Nebukatnesar bai i kam long yupela na em bai i bringim yupela i go kalabus long Babilon.Yupela bai i stap planti yia long ol longwe ples, inap long 7-pela lain tumbuna bilong yupela i kamap. Na bihain God bai i belgut gen long yupela, na em bai i kisim yupela long Babilon na bringim yupela i kam bek long Jerusalem.

Long Babilon, bai yupela i lukim ol piksa bilong ol giaman god ol man i bin wokim long diwai na long silva na long gol. Ol man i save karim ol dispela samting long sol bilong ol na ol haiden i save pret long ol. ▼

▼6.4Long ol bikpela de bilong lotu, ol i save karim ol dispela piksa raun, bai ol manmeri i ken lukim.

Yupela i mas lukaut, nogut yupela i bihainim pasin bilong ol dispela man bilong narapela lain. Sapos yupela i lukim ol man i karim ol dispela piksa na i wokabaut long lain na ol i lotu long ol, yupela i no ken pret long ol dispela giaman god.Yupela i mas tokim yupela yet olsem, “Bikpela, yu wanpela tasol yu God. Na mipela i mas lotu long yu tasol.”Ensel bilong God bai i stap wantaim yupela long dispela ples, na em bai i was long yupela.

Ol giaman god ol i no gat strong bilong ol

Ol kamda i save kisim silva na gol na penim ol piksa bilong ol giaman god, na ol i save kisim ol hap diwai na wokim ol tang bilong ol. Tasol ol i no god tru na ol i no inap toktok. Nogat.Ol manmeri i save wokim bilas gol na putim antap long het bilong ol giaman god, olsem ol i save putim long ol yangpela meri i laikim tumas long putim ol kain kain bilas.

Sampela taim ol pris i save stilim silva na gol bilong ol giaman god na ol i yusim bilong ol yet.Na ol i no save stilim dispela samting tasol. Nogat. Ol i save kisim sampela bilas bilong ol god bilong ol na givim long ol pamukmeri bilong tempel. Ol manmeri i save kisim ol dispela giaman god ol i bin wokim long diwai na silva na gol, na ol i putim laplap samting long ol, olsem ol i man tru.Ol i save putim gutpela blupela klos bilong ol king long ol giaman god, tasol ol dispela god i no inap mekim wanpela samting sapos das i karamapim ol o anis i kaikaim ol.Sapos das bilong haus i pas long pes bilong ol, ol yet i no inap rausim. Nogat. Wanpela man i mas kam klinim pes bilong ol.Ol i holim stik bilong kot long han bilong ol olsem ol jas. Tasol sapos wanpela man i rongim ol, ol i no inap mekim save long em.Ol i save holim liklik naip o tamiok long han bilong ol, tasol ol i no inap helpim ol yet long taim ol man i laik bagarapim ol o stilim ol i go.Dispela olgeta samting i soim yumi olsem, ol i no god tru. Olsem na yupela i no ken lotu long ol.

Ol giaman god i stap insait long ol haus bilong ol dispela lain, ol i rabis tru. Ol i olsem wanpela sospen graun i bruk pinis. Taim ol pipel i kam lukim ol, lek bilong ol i save kirapim das, na em i pulapim ai bilong ol god.Ol pris i save putim strongpela lok long dua bilong haus bilong ol giaman god, bai ol stilman i no inap i go insait. Ol i save banisim ol god olsem kalabusman i bin mekim rong long king na i wet kot.Ol pris i save laitim planti lam moa na putim long haus bilong ol giaman god. Tasol ol dispela god i no inap lukim wanpela.Ol anis i save kaikai bodi bilong ol wantaim klos bilong ol, olsem ol i save pinisim ol diwai bilong haus, tasol ol yet i no pilim.Smok bilong haus i mekim pes bilong ol i blak olgeta.Ol liklik blakbokis na olkain pisin na ol pusi tu i save kam sindaun antap long ol.Dispela olgeta samting i soim yumi olsem, ol i no god tru. Olsem na yupela i no ken lotu long ol.

Ol i save kisim gol na penim ol piksa bilong ol god. Tasol sapos wanpela man i no polisim pastaim, dispela gol i no save lait. Taim ol i laik wokim sampela god long ain na ol i putim ol long paia, ol i no pilim.Maski man i baim ol long bikpela mani, ol i no inap pulim win.Yupela lukim. Ol i no inap wokabaut. Ol man yet i mas karim ol i go. Ol i no inap mekim wanpela samting. Na sapos wanpela bilong ol dispela god i pundaun long graun, ol man i lukautim ol, ol i save sem, long wanem, wanpela wokman i mas sanapim dispela god gen. Na sapos wanpela man i sanapim giaman god long wanpela ples, orait dispela god i no inap lusim dispela ples. Nogat. Sapos wanpela i no sanap stret, em i no inap stretim em yet. Nogat. Sapos man i givim presen long giaman god, i wankain olsem em i givim long wanpela man i dai pinis.Ol pris i save kisim abus ol man i bin ofaim long ol dispela god, na ol i salim bilong kisim mani na ol i baim olkain samting bilong ol yet. Ol meri bilong ol pris i save kisim sol na putim long abus bilong ol ofa, bai em i no ken sting hariap, na ol yet i kaikai. Ol i no save givim long ol rabisman na ol sikman. Nogat.Na tu, ol meri i gat sik mun na ol meri i karim nupela pikinini, ol tu i save holim ol ofa. ▼

▼6.29Long lo bilong ol Juda, ol meri i no inap holim ol ofa. Na sapos ol meri i gat sik mun o ol i karim nupela pikinini, ol bai i stap doti tru long ai bilong God. Lukim Wok Pris 12.1-5 na 15.19-23.

Dispela olgeta samting i soim yumi olsem, ol i no god tru. Olsem na yupela i no ken lotu long ol.

Sapos ol meri tu inap mekim ofa long ol dispela samting ol i wokim long diwai na silva na gol, orait olsem wanem na ol man i save tok ol dispela samting ol i god bilong ol?Long taim bilong sori, ol pris i save sindaun long haus lotu bilong ol giaman god na ol i save brukim klos bilong ol, na katim mausgras na gras bilong het, na ol i no save karamapim het bilong ol.Ol pris i save singaut na bikmaus long ai bilong ol giaman god, olsem ol i stap long kaikai bilong pinisim sori.Ol i save rausim klos bilong ol god bilong ol, na ol i givim long ol meri na pikinini bilong ol.Maski man i mekim gut o i mekim nogut long ol dispela god, wankain samting bai i kamap. Ol i no inap bekim. Ol i no inap makim wanpela man bilong kamap king, na ol i no inap rausim wanpela king.

Ol i no inap givim planti mani na gutpela samting long ol manmeri. Nogat. Sapos man i mekim promis long ol na bihain em i brukim promis, ol i no inap long putim hevi long em.Ol i no inap bosim i dai bilong wanpela man. Na ol i no inap kisim bek ol man nating long han bilong ol strongpela man.Ol i no inap oraitim man i aipas. Na ol i no inap helpim man i painim taim nogut.Ol i no inap marimari long ol meri, man bilong ol i dai pinis. Ol i no inap helpim ol pikinini i no gat papamama.Ol dispela samting ol i wokim long diwai na ol i karamapim long silva na gol, ol i olsem ol ston nating ol i kisim long ples maunten. Na ol man i save lotu long ol, ol bai i sem nogut tru.Olsem wanem na ol man i save ting ol dispela samting i god? Bilong wanem ol man i save tok olsem?

Ol man i save lotuim giaman god, ol i mekim longlong pasin tru

Ol Babilon yet i save semim ol god bilong ol.Sapos ^e wanpela man i mauspas, ol i save kisim em i go long haus lotu bilong god Bel, na ol i save askim Bel long oraitim dispela man. Ol i ting Bel i save harim toktok bilong ol.Ol man i lukim pinis olsem ol god bilong ol i no inap oraitim ol, tasol ol i no kisim tingting long dispela na lusim ol. Nogat. Ol i wok long lotuim ol yet.Longlong pasin bilong ol i go moa yet. Ol meri i save pasim rop long namel bilong ol na ol i save sindaun long arere bilong rot. Na ol i laitim sampela pipia wit na salim skin bilong ol long ol man. Sapos man i kisim pinis wanpela bilong ol dispela meri, dispela meri i save kam bek na lap long meri i bin sindaun klostu long em. Na em i tok bilas olsem, “Man i no bin kisim yu, long wanem, yu no luk nais.”Olgeta samting bilong ol giaman god i no stret. Tasol olsem wanem na ol man i save ting ol dispela samting i god? Bilong wanem ol man i save tok olsem?

Ol man i save wokim ol samting long diwai na long gol, ol yet i wokim ol dispela god long laik bilong ol.Ol man i bin wokim ol dispela god, ol yet i no save stap longpela taim long graun. Olsem wanem na ol i ting ol inap mekim ol god i kamap?Taim ol dispela wokman i dai, ol i no inap larim wanpela gutpela samting i stap bilong ol lain i kamap bihain. Nogat. Ol i larim ol pasin bilong giaman na sem tasol.Sapos pait na trabel i kamap, ol pris i save painim ples bilong haitim ol yet wantaim ol giaman god bilong ol.Sapos pait na trabel i kamap, ol dispela god i no inap mekim wanpela samting. Bilong wanem na ol man i no inap luksave olsem, ol dispela god i no god tru?

Ol dispela god ol i hap diwai tasol, em ol man i bin karamapim long silva na gol. Wanpela de ol haiden na ol king bilong ol bai i luksave olsem, ol dispela god i no god tru. Ol man tasol i bin wokim ol. Olsem na ol i no gat strong bilong god i stap long ol.Husat i no inap save, ol dispela god i no god tru?

Ol dispela god i no inap mekim wanpela man i kamap king, na ol i no inap mekim ren i pundaun.Ol dispela god i no inap stretim ol wok bilong ol yet. Nogat. Na sapos wanpela man i rongim narapela, ol i no ken bekim stret long em. Ol i no inap long mekim wanpela samting. Nogat tru. Ol i olsem ol kotkot i flai nating antap.Sapos haus lotu bilong wanpela god i paia, ol pris i save ranawe, nogut paia i kukim ol. Tasol ol i save lusim dispela god ol i bin wokim long diwai na karamapim long silva na long gol, na paia i kukim em long wankain pasin olsem em i kukim ol pos diwai bilong haus.Ol i no inap pait long ol king na long ol birua. Olsem wanem na wanpela man inap bilip olsem ol i god tru?

Sapos stilman i kamap, ol dispela god ol i wokim long diwai na ol i karamapim long silva na long gol, ol i no inap mekim wanpela samting.Ol stilman bai i kisim ol silva na gol na ol klos bilong ol giaman god na i ranawe i go. Na ol god i no inap mekim wanpela samting bilong pasim ol.Olgeta samting i winim ol giaman god. Tingim wanpela king i no save pret. Tingim wanpela gutpela sospen. Tingim wanpela dua i save haitim ol samting insait long haus. Tingim wanpela strongpela pos i save holim bikpela haus. Olgeta dispela samting i winim tru ol giaman god.

God i bin mekim kamap san na mun na ol sta, bai ol i givim lait long yumi, na ol i save harim tok bilong em.Lait bilong klaut na win tu i olsem tasol. Lait bilong klaut i bikpela na i save go longwe, na win i save go long olgeta hap bilong graun.Sapos God i tokim ol klaut long karamapim olgeta ples, orait ol i save harim tok bilong em.Sapos God i salim paia i kam long heven bilong kukim ol maunten na bus, em i mekim olsem God i tok. Tasol ol giaman god i no inap traim na mekim kain samting olsem.Sapos ol i no inap long mekim gut o long mekim nogut long yumi, orait olsem wanem na ol man inap kolim ol i god tru?Yupela i save pinis, ol i no god tru. Orait, yupela i no ken lotu long ol.

Ol dispela god ol i no inap bosim ol king. Ol i no inap toknogutim ol o blesim ol.Ol i no inap putim wanpela mak long klaut, bai ol man i ken lukim. Ol i no inap lait olsem san na mun.Ol wel animal long bus ol i winim ol giaman god. Ol inap ranawe long ol samting i laik mekim nogut long ol. Tasol ol dispela god i no inap.Yupela i save pinis, ol i no god tru. Olsem na yupela i no ken pret long ol.

Ol dispela god bilong ol arapela lain, em ol i wokim long diwai na ol i karamapim long silva na gol, ol i rabis tru. Ol i olsem wanpela piksa giaman yumi save sanapim long gaden bilong pretim ol pisin i laik stilim kaikai. Ol i no inap was long wanpela samting.Ol i olsem wanpela liklik diwai i gat nil na i sanap i stap long gaden. Em i no pretim ol pisin. Nogat. Em i larim ol pisin i kam sindaun long han bilong en. Ol dispela god i olsem bodi bilong man i dai pinis, em ol i tromoim i go long tudak.Ol blupela klos bilong giaman god i save sting. Na tu ol anis bai i kaikaim ol yet, na ol man i save lotuim ol bai ol i sem tru. Olsem na yumi ken save, ol i no god tru.

Stretpela man i no save lotuim ol giaman god, em bai i win. Long wanem, i no gat wanpela samting inap long semim em.

Ol hap bilong Buk bilong Daniel i kam long tok Grik

Tok i go pas

Taim ol i tanim buk Daniel i go long tok Grik, ol i bin putim tripela bikpela hap tok wantaim. Dispela tripela hap tu ol i bin raitim long tok Hibru o tok Aram pastaim, na ol dispela hap i bin i stap olsem tripela liklik buk, na long tok Hibru ol i no bin i stap wantaim buk Daniel. Dispela olgeta tripela buk i stap nau olsem ol hap bilong Buk bilong Daniel, tasol long buk Baibel bilong yumi, yumi kolim wan wan buk long nem bilong em yet, na wan wan buk i gat ol ves namba bilong em yet.

Wanpela bilong dispela tripela liklik buk, em Prea bilong Asaria na Song bilong Tripela Yangpela Man. Long buk Daniel long tok Grik, dispela em i stap olsem wanpela hap bilong Daniel sapta 3. Em i stap namel long 3.23 na 3.24.

Asaria wantaim ol lain bilong em ol i bin kirapim dispela Prea na Song bihain long taim King Nebukatnesar i bin tromoim tripela long bikpela stov i gat paia i hat tumas.

Namba 2 bilong ol dispela liklik buk, em Stori bilong Susana. Susana em i wanpela gutpela na naispela meri tumas. Tasol tupela jas nogut i sutim tok long em i bin brukim marit na ol i kotim em. Taim ol manmeri i laik kilim em i dai, Daniel i kirap na long gutpela tingting bilong en em i helpim Susana i stap gut.

Long sampela Baibel ol i save putim stori bilong Susana i stap olsem sapta 13 bilong buk Daniel.

Namba 3 liklik buk, em Stori bilong Bel na bilong Bikpela Snek Masalai. Stori bilong Bel i soim olsem wanem kliapela tingting bilong Daniel i kamapim giaman pasin bilong ol pris bilong giaman god Bel. Na Stori bilong Bikpela Snek Masalai i tok long wanpela bikpela snek ol man bilong Babilon i save lotuim. Tasol Daniel i kilim i dai dispela bikpela snek, na ol pris i kotim Daniel na ol i tok strong long king i mas kilim Daniel i dai. Tasol God i kisim bek Daniel na i no larim ol i bagarapim em.

Long sampela Baibel ol i save putim Stori bilong Bel na bilong Bikpela Snek Masalai i stap olsem sapta 14 bilong buk Daniel.

Pr Azar

Prea bilong Asaria na Song bilong Tripela Yangpela Man

Prea bilong Asaria

1Orait ^f tripela yangpela man, Hanania na Misael na Asaria, tripela i kirap na wokabaut namel long paia. Tripela i singim song bilong litimapim nem bilong God, Bikpela bilong ol. 2Na Asaria i sanap i stap namel long paia na em i opim maus na i prea olsem, 3“Bikpela, yu God bilong ol tumbuna bilong mipela, mipela i litimapim nem bilong yu na lotuim yu. Nem bilong yu i mas i stap antap inap oltaim. 4Olgeta samting yu bin mekim long mipela i stret tasol. Na sapos yu kotim mipela, kot bilong yu i stret oltaim. 5Yu bin mekim stretpela pasin olgeta long taim yu bagarapim tru Jerusalem, ples holi bilong ol tumbuna bilong mipela. Dispela em i bekim stret bilong ol sin bilong mipela. 6Mipela i bin sakim tok bilong yu na givim baksait long yu, olsem na olkain asua na sin i karamapim mipela. 7Mipela i no bin mekim wok yu bin tokim mipela long mekim. Tru, sapos mipela i bin bihainim gut ol lo bilong yu, mipela inap sindaun gut. 8Tasol ol dispela hevi na bekim nogut i painim mipela nau, em i asua bilong mipela yet. 9Yu bin putim mipela long han bilong ol birua na ol man bilong kalapim lo, na long han bilong king nogut. 10Nau mipela ol man bilong lotuim yu, mipela i sem tru. Mipela i sem olgeta na mipela i pasim maus i stap.

11“Bikpela, tingim biknem bilong yu na yu no ken brukim dispela kontrak yu bin mekim wantaim mipela. Yu no ken tromoim mipela i stap. 12Yu ^g no ken pasim marimari bilong yu. Bihainim promis yu bin givim long Abraham, pren bilong yu, na long Aisak, wokman bilong yu, na long Jekop, tumbuna papa bilong ol Israel, em ol manmeri bilong yu. 13Na yu bin promis, bai ol i kamap bikpela lain moa, olsem ol sta bilong skai na olsem wesan bilong nambis. 14Tasol Bikpela, nau namba bilong mipela i go daun tru, na ol arapela lain pipel i winim mipela. Long olgeta hap mipela i stap long en, ol i save daunim mipela, long wanem, mipela i man bilong mekim sin. 15Nau mipela i no gat king na i no gat ol profet na i no gat ol lida. Mipela i no gat tempel moa, we mipela i ken bringim olkain ofa na presen na mekim ofa bilong smok i gat gutpela smel. Mipela i no gat ples moa we mipela i ken mekim ofa long yu bilong painim marimari bilong yu. 16Nau mipela i kamap long yu na bel bilong mipela i pas. Mipela i daunim het bilong mipela na mipela i askim yu long kisim bek mipela. I tru, mipela i no gat planti bulmakau na planti tausen patpela pikinini sipsip bilong mekim ofa bilong paia i kukim olgeta. Nogat. 17Tasol ^h nau mipela i tanim bel. Dispela pasin em i olsem ofa mipela i bringim nau. Kisim dispela ofa bai mipela i ken bihainim yu gen long olgeta laik bilong mipela. Wanem man i bilip tru long yu, em bai i no inap sem. 18Nau mipela i promis long bihainim tok bilong yu gen, long olgeta strong na olgeta laik bilong mipela. Mipela i promis long lotuim yu gen na long mekim prea long yu gen. Yu ken belgut long mipela na marimari long mipela. Yu no ken larim ol i semim mipela. 20Bikpela, wokim wanpela mirakel na kisim bek mipela bai nem bilong yu i ken kamap bikpela gen.

21“Tasol yu mas daunim na semim ol lain i save bagarapim mipela. Pinisim strong na pawa na hambakpasin bilong ol. 22Mekim ⁱ save long ol, bai ol i ken save olsem yu wanpela tasol, yu Bikpela na yu God. Na long strong bilong yu yet, yu save bosim olgeta kantri.”

23Ol wokman bilong king, ol i bin tromoim tripela man i go long paia, nau ol i wok long putim wel na kolta na kunai na paiawut i go long paia, bilong hatim paia tru. 24Orait paia i sut i go antap inap long 25 mita, na i kukim ol man bilong Babilon i sanap i stap klostu. 26Tasol ^j wanpela ensel bilong Bikpela i kam daun na i stap namel long paia na i sanap wantaim tripela man na i sakim paia i go bek. 27Na tripela i pilim olsem kolpela win i kamap. Na paia i no kam klostu long ol na i no kukim ol liklik.

Song bilong tripela yangpela man

28Orait tripela man i stap insait long paia i kirap na i singim song wantaim na i litimapim nem bilong God. Ol i singim song olsem,

29“Mipela i litimapim
nem bilong yu, God,
Bikpela bilong ol tumbuna
bilong mipela.
30Nem bilong yu
i mas i stap antap tru,
na em i mas i stap holi.
Olgeta man i mas litimapim
biknem bilong yu oltaim.
31Oltaim ol i mas singim song
bilong litimapim nem bilong yu
na ol i mas amamasim
nem bilong yu
insait long tempel bilong yu.
32Yu sindaun long sia king
na yu winim ol ensel
na yu lukluk i go daun
inap long ples
bilong ol man i dai pinis.
Mipela i mas i stap aninit long yu
na litimapim nem bilong yu oltaim.
33Taim yu sindaun
long sia king bilong yu,
ol manmeri i mas litimapim nem bilong yu.
Oltaim ol i mas singim song
bilong givim amamas long yu.
34Ol i mas amamasim yu
long ples bilong heven.
Oltaim ol i mas singim song
bilong givim amamas long yu.

35“Olgeta ^k samting bilong graun,
yupela i mas litimapim
nem bilong God.
Yupela singsing amamas
na litimapim nem bilong em oltaim.
36Ol skai antap,
yupela litimapim nem bilong God.
Yupela singsing amamas
na litimapim nem bilong em oltaim.
37Olgeta ensel bilong Bikpela,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
38Olgeta wara antap long skai,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
39Olgeta strongpela samting
i save mekim wok bilong Bikpela,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
40San na mun,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
41Ol sta bilong skai,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
42Ren na wara bilong moning,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
43Ol kain kain win,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
44Paia na biksan,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
45Bikpela kol na hatpela win,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
46Wara bilong moning na sno,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
47Ol nait na de,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
48Tulait na tudak,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
49Ais na kol,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
50Aiswara na ren ais,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
51Lait bilong klaut
na pairap bilong en,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
52Olgeta hap bilong graun,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
53Ol bikpela na liklik maunten,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
54Olgeta samting i save kamap
long graun,
yupela litimapim
nem bilong Bikpela.
Yupela singsing amamas
na litimapim nem bilong em oltaim
55Ol wara na solwara,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
56Ol wara i save kamap long graun,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
57Ol bikpela pis
na ol samting bilong solwara,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
58Olgeta pisin bilong skai,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
59Olgeta bulmakau na wel abus,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
60Olgeta manmeri bilong graun,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
61Ol manmeri bilong Israel,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
62Ol pris bilong God,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
63Ol wokman bilong God,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
64Ol spirit bilong ol gutpela manmeri
i bin dai,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
65Ol manmeri i holi
na i save daunim ol yet,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
66Hanania na Asaria na Misael,
yupela litimapim
nem bilong Bikpela.
Yupela singsing amamas
na litimapim nem bilong em oltaim.
Em i bin kisim bek yumi
long ples bilong ol man i dai pinis,
na long strong bilong i dai.
Em i bin kisim bek yumi
long bikpela paia,
na em i bin rausim yumi
long namel bilong paia.
67Yumi ^l tenkyu long Bikpela,
long wanem, em i gutpela,
na marimari bilong en
i save stap oltaim oltaim.
68Yupela olgeta lain
i save aninit long Bikpela,
yupela singsing long em
na litimapim nem bilong em.
Yupela singsing amamas long God,
em i winim ol arapela god.
Yupela tenkyu long Bikpela,
em i save marimari long yumi
oltaim oltaim.”